Arsyeja pse nuk shikoj big-brother reality-show seriale që nga viti 2001. Po, që nga viti 2001 kam marrë vendim të vetëdijshëm e të vendosur që kurrë më mos të bij në kurthën e kotësisë së emisioneve si big brother, big sister e çkado tjetër të ngjashme që ofrohet nga mediat të cilat të vetmin qëllim e kanë rritjen e shikueshmërisë apo klikimeve në mënyrë që të joshin më shumë kompani për të sjellë reklamat e produkteve e shërbimeve të tyre në atë medium.
(Artikuluar nga:Merkur BEQIRI – Ing. DIP, Informatikant nga Peja)
Më 2001, mbase, nuk ka pasur Big Brother as në Shqipëri e as në Kosovë, por kishte në televizionet gjermane, nëse më kujtohet mirë ishte RTL që organizonte këtë spektakël në atë kohë duke i shënjestruar hapësirat gjermano-folëse dhe shikuesit potencial në ato hapësira si subjekte të biznesit të tyre (e ndiqja me antenë satelitore nga Kosova).
Njerëzit janë qenie shoqërore, dhe si të tilla janë kurreshtarë të shohin e dijnë se çka bëjnë anëtarët e tjerë të komunitetit të tyre, si dhe jasht komunitetit e posaqërisht nëse në çfarëdo mënyre mund të identifikohen me objektin e kurreshjtes së tyre. Pra është normal të jesh kurreshtar, dhe përmëshumë e dëshirueshme, sepse doza e shëndoshë e kurreshtjes është mekanizëm kyq i fëmijëve për të i mësuar rutinat e jetesës dhe mbijetesës dhe sidomos në kohërat moderne kur shumë nga këto rutina nuk janë as intuitive dhe as që jemi të përgatitur nga evolucioni për to.
Mirëpo, ajo çka ndodh në rastin e Reality Show, është se mediat në mënyrë të vetëdijshme dhe shumë të sofistikuar e eksploatojnë vetinë tonë të kurreshtjes (të ndërthurur mëpastaj me shumë veti të tjera, si ato të empatisë, inatit etj) për të na mbajtur të lidhur thuaja me një zinxhir të padukshëm në platformën e tyre, duke na dhënë iluzionin se po zbavitemi apo kënaqemi apo se po e përmbushim kohën tonë të lirë me diçka të bukur, interesante etj; por cilido që të jetë iluzioni që ofrohet apo që përdorin mediat, qëllimi/objektiva prapë mbetet e thjeshte dhe e vetme, të ju ngujojnë në platformën e tyre, duke raportuar kështu shikueshmëri më të lartë, klikime më të larta dhe në këtë mënyrë t’i mbajnë kompanitë komerciale pranë vetes së bashku me pagesat e tyre.
Krejt këto i kam ditë edhe në vitin 2001 (pak gjë ka ndërru nga atëherë, përpos klikimeve të cilat janë bë komoditet ekonomik i rëndësishëm). Nuk e shikoja big-brother, por, megjithëse i dija të gjitha këto, thashë, hajt se po filloj me shiku edhe unë, pasi është çu gjithë Gjermania, i vogël e i madh u merrshin me kotësirat e ofruara aty. Thjesht s’dojsha me u largu nga turma.
Dhe ja që në një nga episodet, një çift, të cilët simpatizonin njëri tjetrin dukshëm, por se nuk u dinte se sa larg do të shkojë kjo simpati, në një nga netët, shtrihen bashkarisht në një nga shtretërit dhe flisnin, përshpërisnin dhe qesheshin , giithë kjo duke ndodhur nën jorgan me të cilin u mbuluan përnjëherësh bashkarisht. Dhe të qeshurat, krekosjet, pëshpëritjet vazhduan për nja 10-15 min, e gjithë kjo ishte kapur në një nga kamerat me xhirim infra-kuq (pra ku shihen vetëm hijet në bardh e zi).
Të gjitha tabloidet në Gjermani të nesërmen i kishin mbishkrimet e ngjashme me temë të njëjtë. Athua kanë bërë seks Hansi me Kristinën?! (emrat e imagjinuar për këtë shkrim), apo vetëm janë ledhatuar.
Kjo u bë tema Nr 1 gjatë gjithë ditëve të ardhme në Gjermani, Austri, dhe pjesë të Zvicrës. Dhe kudo tjetër që flitej gjermanishtja.
Pasi që media organizatore e lejoi kohën e duhur për të rritur tensionet dhe ankthin ( e kotë) deri në maksimum të masave, në fund ofruan edhe dëshmi, dëshmi kjo e cila e sqaroi rastin bindshëm edhe për skeptikët më të bindur të të dyja taboreve.
Një pastruese e cila i ndërron çarçafët e shtretërve ku banorët e big-brother flenin, iu kishte tregu çarçafin menjëherë të nesërmen punëtorëve të spektaklit, dmth ishte e qartë se në çarçaf kishte njolla të dukshme që shkaktohen nga një rund i shëndetshëm i seksit.
Dhe e gjithë Gjermania morri frymë thellë, u sqarua edhe një dilemë, dhe tani që e dinin këtë si fakt, filluan akuzimet, morali zihet, arsyetimet dhe në ndërkohë zbulimi i çështjeve të reja të kota, për ti mbajtur shikuesit në ankth për javët e muajt që pasonin.
Eh pra, në atë moment kur e pashë çarçafin, i cili ishte xhiruar ditë më parë, por që ja që nuk e tregonin xhirimin deri sa të arrihet tensioni i duhur në masat e shikuesve, në atë moment, u ndala, i mbylla sytë, dhe i thashë vehtes, Merkur ! Me çka je duke u marrë ? Me çka je duke i përmbush momentet e bukura e të rëndësishme të jetës tënde ??? Me çarçafin e Hansit dhe Kristinës, dhe me çështjen se a është bë me njolla apo jo ?
huh, huh, huh
Thjesht e pata shkund kokën, dhe me nje vendosmëri të prerë pata thënë KURRË MË big-brother, as big-sister, as asgjë të këtij lloji.
Jeta është shumë e shkurtër për tu marrë me intriga të imagjinuara të njerëzve të kotë nga të cilët nuk mund të mësosh asgjë (së pakut asgjë të hajrit për jetën tënde).
Tani, normalisht ende as që i shikoj as që merrem me reality show, por, po shoh se faqet e fb po mbushen me çështje të kota, dhe po më duhet me iu bë shumë postimeve të miqve të respektuar – hide, hide (fshihe, fshihe …)
PS:Mos ti bie që po akuzoj apo kritikoj këdo si individ apo cilëndo kompani në veçanti. Po e shprehi mendimin për një fenomen shoqëror dhe mediatik, zëshëm. 
Kaq !
Artikuli paraqet mendimin e autorit.